A miña primeira entrevista na TVG

Esa primeira vez foi no ano 2004, con Tino Santiago, e para falarmos da que era a 4ª edición do Correlingua con ese xeito de organización. Véxome, escóitome e constato que era un rapazoliño. Tamén se pode observar a denuncia de enganos reiterados polo poder para nos negar os nosos dereitos lingüísticos e para nos roubaren a esperanza dun futuro mellor. Hai que contextualizar nos tempos dos estertores do fraguismo tanto os problemas como as solucións que se dan .

Ben, dixen que foi a primeira entrevista na TVG, mais ben poucas máis tiven, for como presidente da Mesa (até onde eu lembro, hai outras dúas: a de Miraxes e a de Carlos Luís Rodríguez), como candidato (tamén, até onde a miña memoria alcanza, foi unha, aínda que concedo que nesas semanas de frenesí podo esquecer algo) ou como escritor (agradezo que se noticiase a maioría dos meus libros, mais o número de entrevistas que tiven como autor é unha cifra redonda). En fin, tamén é bo lembrar isto para que non pasemos por naturais as censuras mediáticas que levamos tantos anos padecendo.

Os que acabo de citar son só exemplos puntuais dunha longuísima e amplísima listaxe que, nos últimos anos, leva advertindo con perseverenza e enerxía o movemento Defende A Galega.

Ligazóns ao desvío para un vinte e un de febreiro

• Espazo web do programa Alalá da TVG. Moi recomendábel!
• "Virxilio Viéitez: retrato dun decolonizado", Xoán Carlos Garrido Couceiro. 
• "Doña Angelita, a ferrolá que inventou o libro electrónico".
• "En Marea: seis ceros á esquerda", Cousas de Imeneo.
• "A Valedora advirte de situacións en que o Sergas trata como 'doentes' ou 'pervertidos' persoas LGTBi".
• Algunhas versións de "Adiós ríos, adiós fontes" ou "Adiós, que eu voume" (é unha entrada que fixen no meu blogue en agosto de 2014, mais que pode ser simpática de recuperar para esta semana en que festaxamos o día de Rosalía).

Carlos Luis Rodríguez

No El Correo Gallego Carlos Luis Rodríguez vén de publicar un artigo dedicado a me criticar por encabezar a lista de NÓS - Candidatura Galega ao Congreso pola Coruña. É curioso que, aínda que se trata dun texto de crítica ad hominem, en ningún momento se atreva a dicir o meu nome. Anímoo a xuntar as letras que o compoñen, verá que non pasa nada: "Carlos Callón", así de faciliño.

Penso que é a primeira vez que Carlos Luis Rodríguez se refire a min desde que o 19 de outubro de 2009 gravou unha entrevista comigo para a TVG, tras unha manifestación masiva  en defensa do galego e contra as políticas retrógadas do PP impulsada pola asociación que eu daquela presidía, A Mesa pola Normalización Lingüística. Esa entrevista, que se converteu en viral, tense pasado en facultades de Comunicación como exemplo do que un entrevistador con ética xornalística non debe facer.

Carlos Luis Rodríguez non mantiña un estilo agresivo con todos os convidados que entrevistaba na TVG, pois nese caso sería oportuno e mesmo interesante o acontecido aquel día na televisión pública galega. Chega con cotexar aquela "entrevista" coas conversas de sobremesa coa presidenta e case única socia da galegófoba Galicia Bilingüe, ou cos conselleiros que neses momentos levaban a cabo os principais retrocesos contra o noso idioma. Todos eses programas son fáciles de encontrar en internet e comparar para que cadaquén tire as súas conclusións.

Desde esa entrevista nunca máis pisei un plató da TVG até hai unha semana, malia que a asociación que presidín até 2014 chegou a reunir 100.000 persoas en Santiago de Compostela en defensa do galego ao ano seguinte e en sucesivas convocatorias.

E que despertou o interese de Carlos Luis Rodríguez pola miña persoa seis anos despois daquela entrevista? Pois que, como antes dixen, volvín á TVG como candidato de NÓS e o primeiro que fixen na emisión ao vivo foi beliscarme, para estar seguro de que estaba alí despois de tanto tempo.

Non podo negar que sempre me sorprendeu a teima de Carlos Luis Rodríguez contra a lingua galega, moito máis tendo en conta que grazas a este idioma tivo contratos nunha televisión que non existiría se non tivésemos idioma propio.

Outra das súas lerias, que repite esta semana tras varios anos no caixón dos argumentarios, é a de me presentar como alguén que disimula as súas ideas para enganar. Na súa cabeza non colle que eu, sendo nacionalista, sendo militante de base do BNG, consiga  sentarme e unir esforzos con persoas de sensibilidades políticas diversas.

Non entendeu, ou non quixo entender, que eu puidese encabezar un movemento social de masas en defensa do idioma galego no cal tiveron presenza todas as forzas de esquerdas, galeguistas e nacionalistas de Galiza. Non entende tampouco agora, nin quere entender, que como candidato de NÓS estea a ser capaz de xuntar forzas e persoas, de novo de sensibilidades diversas, nun  ilusionante proxecto común, que vai dar a gran sorpresa nestas eleccións, por moito que a Carlos Luis Rodríguez lle desguste que Galiza teña unha voz propia que fale alto e claro en defensa deste país, tamén en Madrid.

Este blogue e 2014

Por me distraer doutras preocupacións, bótolle un ollo á ferramenta de Google Analytics para saber que cousas vos interesaron máis ás persoas que pasastes por este blogue ao longo dos 365 días de 2014.

O primeiro que me sorprende é que, segundo eses datos, o 61% das persoas que entrades por acó sodes máis novas ca min: seica o 27,50% sodes de entre 18 e 24 anos e o 33,50% de entre 24 e 34. Se tal información for fiábel (que non o sei en que grao), pregúntome por que máis dese tempo ca da miña idade ou maiores? A resposta da fenda tecnolóxica non me vale...

Tamén me sorprende ver o dato (aquí teñen de todo!) de que o 57,34% das persoas que fixestes unha visita desde un dispositivo móbil foi desde un Apple iPad. Dade un saudiño quen así sexa, que vexo que sodes (ou fostes?) maioría.

Vou con outra curiosidade máis. Aínda que son diversas as procuras en internet que acaban por levar para acó, e algunhas son mesmo sorprendentes e inverorsímiles porque nada teñen a ver con esta bitácula, a que trouxo a máis xente é "carlos callón topónimos deturpados". Oxalá axiña non fixese falta unha procura tan patética que demostra até que punto continúan a vulnerarse dereitos básicos.

E imos xa coa derradeira curiosidade. As ligazóns máis vistas en 2014 foron:

1) Carta de despedida da presidencia (e de continuidade do activismo!)

2) Titular da TVG: "Os encapuchados falaban galego".

3) La imposición del gallego, en cifras.

4) "Encapuchados y con acento gallego" (de 2013)

5) A Esmorga: un novo salto para o cinema galego.

6) Desde o sábado será o novo presidente da Mesa. Forza!

7) Música para a segunda feira: Paco Nogueiras canta o Samaín e o galego.

8) Non aceptamos pulpo como animal acuático (nin como animal de compañía).

9) O Goberno galego favorece a ignorancia da cultura propia.

10) "Prefieren a veces callarse o contestar con monosílabos".

Ligazóns ao desvío para un catorce de decembro

• Dicionario galego de sinónimos en liña.
• "Dez anécdotas reais sobre o galego", Xoán Abeleira. 
• "1 noticia, 10 posibles interpretacións", Enchufados. 
• "Monumentos de tinta III. A historia da literatura galega de Carballo", Román Arén.

Titular da TVG: "Os encapuchados falaban galego"

A TVG salienta que uns criminais que actúan en Galiza falan en galego.

Isto é galegofobia, moito máis intolerábel nun medio público que existe para defender o noso idioma e para dar unha imaxe veraz do país. Súmase, iso si, a unha longa listaxe de oprobios no mesmo camiño por parte de diferentes medios de comunicación que presumen de galegos (botádelle aquí un ollo e arrepiádevos un pouco).

Podedes ver a nova, do informativo Galicia Noticias do 5 de decembro, no minuto 13 da seguinte ligazón.

Souben disto grazas á información proporcionada pola xornalista Iria Méndez.

Ligazóns ao desvío para un trinta de novembro

•  Morre Francisco Carballo, unha figura central na cultura galega.
• "Si no eres del PP, jódete, jódete" (2), no blogue de denuncia da manipulación informativa da TVG.
• A Mesa anima a apoiar a iniciativa Herdo Novo.
• "A Nación Galega en Pé". Exposición sobre o 50 aniversario da fundación da UPG.
• "Nacionalismo galego e 'nova política' españolista", Francisco Rodríguez.
• "A democracia televisiva", Xosé Mexuto.
• "Son un dos postos de traballo creados en setembro, a 58 euros ao mes", Carlota E. Ramírez.

Atravesar o fantasma, esta semana na Radio Galega

Esta semana o Diario Cultural da Radio Galega emitirá cada día un poema do libro Atravesar o fantasma, que me pediron que escollese e recitase eu mesmo. Espero que gustedes da selección, do recitado e, claro, deste libro que é tan especial para min.

Aos de sempre ben se ve que lles doe

A terceira forza nas anteriores eleccións europeas en Galiza, o BNG, non sairá nin un segundo máis nos informativos da RTVG no que resta de campaña. Xustifican a censura pura e dura cun argumento ridículo: que, como o BNG se presentaba nunha coalición máis ampla, os máis de cen mil votos que entraron nas urnas galegas con ese logotipo non contan. Vaia democracia!

Éncheme de carraxe esta mordaza aplicada discrecionalmente desde o poder ás ideas que máis incomodan ao propio poder. Unha e outra vez relense as regras do xogo para que fique claro que todo iso de que se pode escoller libremente non é máis que un slogan para as grandes superficies.

Tentarei axudar intensamente neste tramo final da campaña, para que a xente poida coñecer e valorar unha formación que os medios públicos autonómicos silenciarán, mais que existe e que ten a defensa da nación galega como razón de ser. A liberdade de expresión, o pluralismo político e os dereitos de Galiza son causas polas que paga a pena mollarse. Non ollemos para outro lado mentres estas cousas acontecen.

Mobilicémonos contra este goberno de dráculas

Estannos a chuchar o país: a economía que cae e cae a pesar da propaganda, unha poboación que se desertiza e con tendencia a ir a peor, unha lingua desprotexida e cunha hemorraxia de falantes que pon en risco a cohesión social e a continuidade da cultura galega...

O futuro que nos debuxan no goberno de dráculas que padecemos é escuro. Mais podemos lograr o fracaso dos maos agoiros!

Defender o noso idioma é tamén defender a dignidade do país no seu conxunto. Non somos un almacén de man de obra barata e recursos para malgastar. Somos unha nación, con lingua e cultura de seu. O 17 de maio sairemos de novo ás rúas de Galiza para o exclamarmos ben alto!

Na Coruña, Lugo, Ourense, Pontevedra, Santiago, Vigo, Ferrol e Foz ás 12 do mediodía reclamaremos os pasos adiante que tanto lle cómpren a este maltratado pobo. Queremos galego!

(A propósito, a pesar do que diga a TVG, non son ex presidente da Mesa, senón que son presidente da asociación até o vindeiro sábado. O curioso é que, se pensaban que eu son o ex presidente e o presidente actual -en realidade, o futuro- estaba presente no acto e interviu moi ben intervido, non se entende moi ben por que non emitiron nin por un segundo a súa imaxe e as súas declaracións. Parece que teñen présa por me veren fóra e por lle daren ben á censura ao compañeiro Marcos Maceira.)

Igualdade de dereitos... Para cando?

Esta segunda feira os compañeiros Marcos Maceira e eu, en representación da Permanente da Mesa, reunímonos coa deputada Ana Pontón. Ela pediunos esta xuntanza para nos explicar o que fixeron desde o grupo parlamentar do BNG para tentaren evitar que haxa unha materia da UNED que reste puntos a quen utilice a toponimia galega de forma correcta e oficial. Se pensades que lestes mal, teño que avisarvos que non: hai unha materia da UNED en que se di que hai que usar Arteijo, Carballino, Poyo... Se pos outra cousa nos exames estás a responder incorrectamente e xa se deu o caso de a quen lle restaron puntos por escolleren o topónimo Ourense como forma a utilizar. Trinta e un anos despois de se aprobar a Lei de normalización lingüística!

Aproveitamos a comparecencia aos medios para denunciar tamén que o galego é a única lingua do Estado en que non se pode estudar unha carreira a distancia.

Para cando a igualdade de dereitos?

Auguiña de sete fontes (18)

 

2 habitantes menos cada hora no país das 1.500 aldeas abandonadas.

Un home derrubou a súa casa e entregou os cascallos ao banco que o ía desafiuzar. A casa estaba hipotecada, mais o terreo era da súa propiedade :)

O trato hospitalario preferente para Bárcenas non é noticia na TVG.

"Cinema en valencià o la igualtat", Ferran Suay. (Interesante reflexión, aínda que, como sabedes, en Galiza a situación aínda é máis precaria: 0% este Nadal...)

Sobe o paro en Galiza no mes de decembro e diminúen, en 2013, as/os afiliadas/os á Seguridade Social en 12.757.

"Un ano á intemperie", Manuel Bragado.

"Si soy del amo, él me ama", Isabel Lucioni.

Auguiña de sete fontes (15)

•  A Galiza prácida de Anestésicos Feijóo: Sen políticos da oposición galega no Telexornal do sábado.
• "Sexting mata?", Maralice de Souza Neves.
• "No hay más sexualidad que la desviada": Manuel Fernández Blanco sobre o caso de Domingo Neira.
• Vídeo do estampido de deputadas e deputados no Congreso en 2007, cando o BNG presentaba unha iniciativa para que finalizase o veto á construción naval civil en Ferrol, un tema fulcral para a economía do país. Hai pouco falouse doutra desbandada semellante, cando os deputados e as deputadas saíron a fume de carozo para apañaren os transportes que os levarían para os seus fogares. Sen dúbidas, a de 2007 é máis significativa sobre o papel do Congreso e o papel de Galiza no Estado. Tróuxoa moi ben á memoria o blogue Cousas de Imeneo.
• O CSIC evita titular a súa revista galega en galego "para no perder prestigio". O conselleiro de Educación e Cultura, presente no acto, declinou dicir nada ao respecto. O secretario xeral de Política Lingüística, ao día seguinte, tamén amparaba o asunto e só dicía, de xeito propagandístico e disparatado, que daría diñeiro para unha edición galega da revista. Recordemos ao respecto a situación do galego no campo das pesquisas académicas e, tamén, a desatención da Xunta aos medios de comunicación no noso idioma.
• Vídeo da recente chuva de pedras en Sicilia, vindas do Etna.
• A imparábel ruína de Pompeia. A reformulación de orzamentos públicos e a externalización de servizos, ou como queira que chamen aló aos recortes e ás privatizacións, parece que tamén teñen o seu peso na aceleración do declive.

Impunidade nunca máis!

Mañá comezo o día cunha entrevistiña, a iso das 9.15, na Radio Galega, onde falarei sobre moitas cuestións relacionadas co presente e futuro do noso idioma.

Saio despois camiño de Lisboa, por compromisos adquiridos hai xa tempo, o cal me vai impedir estar fisicamente nalgunha das concentracións convocadas por Nunca Máis para a noitiña.

Se alguén dos que estades por aquí sabedes se se vai facer algo a esa ou outra hora na capital portuguesa, por favor avisádemo nos comentarios. O meu pensamento e o meu corazón estarán convosco, coreando as mesmas consignas de dignidade:

Contra a impunidade! Non esquecemos!

Auguiña de sete fontes (9)

• O psiquiatra que "descubriu" o TDAH confesou antes de morrer que "é unha doenza ficticia".
  
• Entrevista á interesantísima arquitecta Beatriz Colomina.
  
  
• "O fechamento da TV pública grega anuncia o final da democracia", mesmo da democracia formal.
  
• Once estudantes imputados por se mobilizaren en defensa do ensino público. Toda a solidariedade!
  
• O berberecho común dáse por desaparecido na Ría da Arousa :(
  
• Un extraballador de Goldman Sachs dío clariño, por se había quen o dubidase: "Creabamos pánico nos mercados para sacarmos beneficio da caída de España".
  
• Escándalo e vergoña pola manipulación informativa da TVG con Xerardo Conde Roa.

Auguiña de sete fontes (4)

- "Miedo al miedo", un artigo de Antoni Vicens.

- "¿Habla gallego? ¡Llamad a la Policía!", nova en Sermos Galiza sobre a entrada "Encapuchados y con acento gallego" neste blogue.

- "O día en que Google percorreu as feridas de Fukushima".

- Blogue do Comité de Empresa da TVG, para a denuncia da manipulación informativa e para a defensa da creación dun Consello de Informativos.

- "Goza Beyonce!", entrada no blogue do Silvio Rodríguez sobre a visita de Beyonce a  Cuba.

- "Denegan a nacionalidade española a un inmigrante por non saber o nome da muller de Rajoy", informa Ara.cat.

- "Un galego é o primeiro elixido polo Papa". Entrevista de Perfecto Conde a José Rodríguez Carballo. É interesante sobre todo as reflexións sobre o galego na Igrexa -que non van para alén da diglosia- e a lembranza histórica da prohibición do galego nos seminarios.

Protesta contra a manipulación informativa da CRTVG!

Enviemos todas e todos un texto como o que se indica a acontinuación ao enderezo dx@crtvg.es, pertencente ao director xeral da CRTVG, Alfonso Sánchez Izquierdo. A proposta provén dunha campaña presentada hoxe pola Mesa.

Prezado señor Sánchez Izquierdo:

O pasado día dez de outubro, A Mesa pola Normalización Lingüística presentou un informe sobre a situación do ensino en galego na educación infantil das nosas cidades. Segundo este relatorio, que en ningún momento foi negado polo Goberno galego, nos últimos anos produciuse unha caída en picado do uso do noso idioma: só 3% deses centros declaran impartir na lingua de Galiza, o cal resulta a porcentaxe máis baixa da nosa historia autonómica e tamén moitísimo máis baixa que en ningunha outra comunidade autonóma con idioma propio diferente do español.

Estes datos saíron en todos os medios de comunicación de Galiza e en varios de fóra do noso país, porén foron censurados nos informativos da Radio Galega e da TVG, igual que se censura ou manipula todo posicionamento que sexa diverxente ás teses do Partido Popular (en todo o ano 2012, por exemplo, a TVG só cubriu unha única conferencia de imprensa da Mesa pola Normalización Lingüística, a maior asociación cultural de Galiza). É rechamante que tanto o mesmo día 10 de outubro como o 11 de outubro, a pesar de que censurasen esta información, si servisen de megafonía a declaracións de José Ignacio Wert como de Alberto Núñez Feijóo sobre a lingua do ensino en Cataluña.

Nun momento como o actual, en que a nosa nación se encontra en plena campaña electoral, é máis importante que nunca que a sociedade galega poida contar cunha información diversa, plural e veraz nos medios públicos autonómicos. Reclámolle por todo iso que tome as medidas precisas para garantir esa diversidade, pluralidade e veracidade e que, como primeiro e significativo exemplo desa mudanza, pase a ofrecer o debido espazo nos informativos a este estudo sobre a caída do ensino no noso idioma na educación infantil debido ao goberno de Alberto Núñez Feijóo.

Cumprimentos cordiais,

Sairá isto na CRTVG?

Até sempre, Avelino!

Mañá, 21 de agosto, estará aberta até as 19 h a capela ardente do  irmán maior Avelino Pousa Antelo. Será no local sociocultural da Ramallosa, a carón da Casa do Concello de Teo. Non deixemos de lle tributar a homenaxe debida ao compañeiro que se nos foi, mais que permanecerá para sempre como exemplo e símbolo desta nación que quere continuar a existir.

Sobre a súa irreparábel perda enviei este artigo para Sermos Galiza:

Até sempre, Avelino!

Morreu o incansábel compañeiro Avelino Pousa Antelo. Foise un testemuño da loita polo autogoberno reprimido en 1936, si. Foise a derradeira voz que nos falou en primeira persoa de Daniel Castelao, sen dúbidas. Mais que non nos presenten a Avelino só como un eco do pasado, porque é faltar á verdade.

Ben o sabemos os que puidemos escoitar as súas firmes palabras contra a manipulación de Castelao, por exemplo nos gobernos de Manuel Fraga Iribarne. Foi nunha desas ocasións cando o coñecín persoalmente. Era o ano 2002 e el mobilizouse en primeira fila, xunto coa Mesa, contra as representacións en Galiza, pagas pola Xunta, de Los viejos no deben enamorarse. Non lle importaba, como a outros proclamados “galeguistas históricos”, perder prebendas do poder autonómico por erguer a voz.

Ben sabemos que Avelino non foi un eco do pasado os miles de persoas que escoitamos as súas rexas e lúcidas palabras en varias mobilizacións convocadas pola Mesa pola Normalización Lingüística (da cal era presidente de Honra) ou pola plataforma unitaria Queremos Galego. Estaba na novena década da súa vida, mais continuaba a encabezar mobilizacións en defensa do noso dereito a existir. Quen que alí estivese non ten gravadas a lume as súas palabras? Como non lembrar a súa contundencia ao criticar os “descastados” do actual goberno autonómico? Como non respirar de novo a emoción que brotaba da súa gorxa cando contemplou a enorme resposta social para parar as medidas contra o galego do goberno de Alberto Núñez Feijóo? Aos manifestantes, desprezados polo PP e polo propio presidente da Xunta nos días anteriores, Avelino animábaos, animábanos: “Por xente coma vós, Galiza non morrerá, o galego non morrerá.”

Quererán reducírnolo a un “galeguista do 36”, mais foi moito máis ca iso. Ben o saben algúns cínicos que agora din homenaxealo, aínda que sexan os mesmiños que censuraron as súas intervencións na Radio Galega nada máis regresar o PP ao goberno da Xunta. El tomábao con humor, mais nin edulcoraba o seu discurso nin claudicaba: “Eu fun gravar á Radio Galega, mais xa supoño que non o van botar”. Os tristemente hipergobernamentalizados informativos da TVG chegaron mesmo á difamación contra a súa figura por encabezar a histórica manifestación do 18 de outubro de 2009. Mais el continuou a dar a cara e a ser a nosa voz nestes tempos tan duros de ataques contra os alicerces da nación galega.

Até sempre, compañeiro, continuaremos co teu exemplo vivo na memoria, nos afectos e na acción!

Mira por elas!

Esta mañá asistín á presentación da Plataforma Cidadá en Defensa da RTV Pública Galega, da cal forma parte A Mesa pola Normalización Lingüística.

Se aínda non asinaches o manifesto, podes lelo e apoialo desde esta ligazón.

Mira por elas!

Miremos por elas!