25 de mai de 2015

Algúns flashes do día despois

  • Todo o que sexa menos dereita cavernícola e menos centralismo é positivo.
  • Son nacionalista galego e vouno continuar a ser sexan cales foren os ciclos electorais. Acredito na autoorganización e son feliz defendendo estas ideas de convivencia, xustiza, liberdade e igualdade. Aí estiven, aí estou e aí estarei.
  • As mudanzas de ventos electorais son nestes tempos tan rápidas que o que vale pola noite xa non vale na madrugada. Cómpre pensar, mais non precipitarse con fotos fixas.
  • A miña impresión é que o BNG saíu reforzado en militantes e novos cadros destas eleccións. Iso non se acompasou cos resultados electorais agardados na maioría dos concellos e, en especial, en varias das cidades.
  • Porén, tamén hai varias boas novas no cómputo electoral: o BNG aumenta o número de representantes no conxunto de Galiza, case duplica o número de maiorías absolutas, aumenta o número de concellos en que pode ser forza de goberno e, presumibelmente, terá a vicepresidencia de tres das catro deputacións galegas. Ademais, mantense como 3ª forza no conxunto do país e a décimo primeira do Estado en número de concelleiras e concelleiros. Tras todos os danos recibidos por esta marca electoral nos últimos tempos, non é pouco!
  • As outras forzas saídas do BNG e que se posicionan no campo nacionalista e/ou galeguista tiveron algúns grandes éxitos simbólicos, ben nas coalicións en que participaron ou que apoiaron (sobre todo as tan citadas A Coruña e Compostela) ben en solitario (a sorpresa de Lalín). Non vou ocultar que me preocupa a dependencia madrileña dalgunhas das forzas coaligadas nas chamadas mareas. Tamén hai que observar que o que gañan no cualitativo non o gañan no cuantitativo en votos / representantes no conxunto de Galiza e talvez iso deba ser razón para a reflexión pola súa banda.
  • Non está moi claro que pode acontecer nas vindeiras eleccións Xerais. Sería un desastre que se perdese a voz do nacionalismo galego no Congreso, máxime nun tempo en que se van debater moitas cuestións fundamentais para o futuro do noso país.
  • A grande imaxe da noite para min foi o rostro de Alberto Núñez Feijóo na súa comparecencia. Os principais gobernos locais que lle restan serán a un prezo elevadísimo nos pactos e perde todas as deputacións, xa que a de Ourense fica nas mans dos Baltar, inimigos internos. Parece evidente que non se vai presentar á reelección como presidente da Xunta e mesmo o seu salto á política estatal se ve gravemente comprometido.
  • Estou moi alegre porque o PP perdese a maioría absoluta na miña vila natal, Ribeira (só teño un recordo infantil de que iso acontecese con anterioridade!), e porque o BNG continúe como segunda forza do Concello, subindo mesmo en porcentaxe de voto a respecto da anterior convocatoria. Ábrese un novo ciclo de moito interese.
  • É un mazazo a perda da representación do BNG nas cidades de Vigo e Ourense. Haberá que ver caso por caso todo o que hai que facer para que a situación mude, e facelo. O nacionalismo é demasiado necesario. Iso si, como xa dixen máis veces e tamén con outras forzas, non podo deixar de apuntar o inxustísimo dunha lexislación electoral que provoca que, como nestes casos, o 4,82% e o 4,58% das persoas votantes fiquen sen representación a pesar de que, aritmeticamente, si lles correspondería.
  • Unha das peores novas da xornada é a maioría tan absoluta de Abel Caballero, que todo apunta a que quere asumir o negativo papel de "Paco Vázquez do sur". Por exemplo, parece que vai ser o único alcalde dunha cidade galega que se negue a falar con normalidade no seu cargo no idioma do país. Esa actitude é unha declaración de intencións sobre moitas máis cousas, como é ben sabido.
  • Hai moito que traballar tamén para que as eleccións sexan limpas e máis libres. Continúan a producirse casos de carretaxe, actitudes agresivas verbalmente por parte de representantes do PP polo menos nalgunhas zonas, etc. Sei ben do que falo, pois onte vin e vivín ambas as situacións no colexio electoral en que estiven...

22 de mai de 2015

#DependeDeNós

Entre os actos que tiven en varios puntos da xeografía galega polo festexo das Letras e a campaña electoral, nesta quincena adelgacei máis que indo ao ximnasio. Mais abofé que pagan a pena todos estes esforzos. Como ben dixo Castelao, temos fe no noso pobo e moi logo o noso pobo terá fe en nós.

Formiguiñas, forza e adiante! Depende de nós!






























19 de mai de 2015

Quen son?

Aconséllovos que vexades e difundades esta marabilla que, co tema "Quen son?" de Magín Blanco, fixeron a profe de infantil Sara Lijó e os seus alumnos e as súas alumnas do CEIP de Frións (Carreira, Ribeira):


11 de mai de 2015

Atravesar o fantasma: de Ribeira a Ribadeo


Hoxe teño un día completo, en especial por volta do poemario Atravesar o fantasma. Como se pode ver na fotografía do cartaz pendurado no IES Leliadoura de Frions (Carreira, Ribeira), ás 10.50 falarei para varios grupos de estudantes do meu concello sobre este libriño. Xa vos contarei que tal foi a cousa.

A primeira hora da tarde ministrarei outra conferencia para estudantes de secundaria de Ribadeo sobre Como falar e escribir en galego con corrección e fluidez. Xa polo serán, ás 20.30 h. na libraría Casa das Letras, conversaremos con todas as persoas interesadas sobre vida, poesía e psicanálise e como se declinan en Atravesar o fantasma. É un acto organizado pola dinámica asociación cultural Francisco Lanza.


(A foto débolla a Uxía, aka summertimeplz no Instagram.)

8 de mai de 2015

A infancia esquecida

 

O Instituto do Campo Freudiano en Galiza organiza esta tarde e mañá de mañá a súa xornada anual, nesta ocasión co tema "A infancia esquecida". Os actos comezan hoxe na Fundación Paideia, na praza de María Pita, 17, da Coruña. As persoas interesadas poden matricularse nesta ligazón.

Velaquí o programa:

8 de maio

17 h. Flashes
- "O interese superior do menor", Carmen Garrido.
- "Literaturizar a infancia. Dunha escrita a outra escrita", Carlos Callón.
- "O tempo hiperactivo", Marta Maside.
- "A memoria colectiva", Mª Jesús Aradas.
- "De que esquecemento falamos?", José Gómez.
Presenta: Carmen Garrido.

 19 h. Descanso.

19.30 h. Máis flashes
- "Escoitar o inconsciente", Eugenia Insua.
- "A infancia eternizada", Liana Velado.
- "O suxeito na discapacidade", Lucía Fernández Álvarez.
- "Debuxando a felicidade", Juana Vázquez Silva.
- "O esquecemento dos nenos", Almudena Collantes.
Presenta: Dolores García de la Torre.

9 de maio

10 h. Conferencia: "A infancia esquecida, o lugar do neno", Mariam Martín Ramos.
Presenta: Eugenia Insua.

11.30 h. Descanso.

12.00 Conversa e debate.
Coordina: Manuel Fernández Blanco

7 de mai de 2015

No tempo de Follas novas

Teño nas miñas mans un exemplar do libro No tempo de Follas novas, ideado e coordinado por Pilar García Negro. Trátase dun abano en que se representan algunhas plumas contemporáneas de Rosalía, como ben se pode aventurar se se uniren o título e a tan afortunada cuberta que aquí vemos. Así mesmo, como introdución inclúese unha antoloxía e un proveitosísimo comentario inicial sobre ese poemario rosaliano.

Volverei neste blogue máis adiante para comentar algo máis sobre este traballo, ao cal contribuín cunha pequena achega sobre a escritora brasileira Júlia Lopes de Almeida. De momento, quero avisarvos de que a presentación en Lugo será hoxe ás 19 h no Museo Provincial e mañá en Santiago ás 20.30 h na Feira do Libro.

2 de mai de 2015

Listas negras, listas brancas

 


En listas negras institucionais xa estou abondo, así que a miña alegría se multiplica por estar nas listas brancas de tanta xente:

Atravesar o fantasma continúa como o libro de poesía en galego máis solicitado, por terceiro mes consecutivo. Como falar e escribir en galego con corrección e fluidez permanece entre os libros máis vendidos en Amazon no noso idioma e, a nivel de Estado, entre os máis demandados nas seccións de "Lingüística" e "Gramática".

Moitísimas grazas!