Unha canción para o 8 de marzo

"Eva", de Silvio Rodríguez:

Neocons

Velaquí un vídeo feito por alguén en youtube para a canción "Neofatxes globals" de Lluis Llach, que para Galiza volve ser moi acaída, aínda que habería que mudar algunhas das fotos que aí aparecen para actualizalo. Imaxinade vós a que nova imaxe correspondería mellor agora cada verso:



Deixo aquí a letra:

Mireu-los com van,
senyorets des de sempre
se´ls hi nota a l´esquena
que no han acotat mai.

Mireu-los com van,
són la vella caverna
però amb les noves caretes
per seguir mal manant.

Ara són més polits que els seus pares
i es disfressen amb plomes de Harvard
però si arriba el poder, adéu Proust, adéu Brecht...

Mireu-los com van,
són l´Espanya de sempre,
la d´antigues tenebres
que van ressuscitant...

Mireu-los com van
presumits i fatxendes,
és l´adéu als complexos
pels pecats dels "papás".

Pel poder, que els manté tan "contentos",
ja no calen els "pronunciamientos",
ara guanyen escons sense el clam dels canons.

I mentre a la Gangreunió els Nostrats s´esveren,
Senyor, si arriba a fer mal un fatxa pel rera,
nosaltres els vestim sants per la democràcia,
ja veus amb quins cops de pal ens tornen les gràcies,
ells porten els pantalons, nosaltres les calces,
ells són els "toreadors", nosaltres les banyes,
i ara què fem, on anem, no ens queden banderes,
i com se´ns creurà la gent si fem marxa enrera...

Mireu-los com van,
neofatxes de sempre,
neofatxes per sempre
neofatxes globals

Mireu com anem,
engreixant als bandarres,
empenyent el desastre
fins el dia de... ah!

Na defensa da nosa lingua propia

Anotade, por favor, nas vosas axendas, estes actos nacionais que se realizarán en Santiago e nos cales todas e todos imos facer moita falta:

9 de marzo, 19 h, Galería Sargadelos (Rúa Nova, 16): Reunión aberta para comezarmos a programar as actividades das próximas semanas en defensa do noso idioma.

28 de marzo, 19.30 h, Auditorio de Galiza: Acto aberto para clausurar a Asemblea Xeral da Mesa.

17 de maio, 12 h, Alameda: Manifestación. Ten que ser histórica!

Podedes ver aquí información sobre a conferencia de imprensa que demos hoxe á mañá anunciando todo isto e valorando as medidas do PP.

Dúas presentacións e unhas xornadas de interese

Ademais do convite que tedes aí arriba para a presentación desta obra de teatro dunha das miñas poetas preferidas, fágome eco de que mañá, sexta feira, finaliza en Lugo a campaña de divulgación por parte do autor do romance O Globo de Shakespeare, de Santiago Jaureguizar. Podedes estar alí ás 20 h do serán na libraría Trama.

Aliás, quero que saibades das interesantísimas II Xornadas de Historia de Galiza, que se realizarán en Ferrol entre mañá e o 15 de maio, organizadas pola Sociedade Cultural Medulio e a Universidade da Coruña. A asistencia é libre, co horario de 19 a 21 h, no auditorio da UDC nese campus. As conferencias serán as seguintes:

6 de marzo: "Prisciliano", Xosé Carlos Santos
13 de marzo: "San Rosendo e o reino orixinario", André Pena Graña
20 de marzo: "Xelmírez, os Traba, o emperador Afonso VII", Santiago Jiménez
27 de marzo: "O reinado de Fernando II e Afonso IX", Camilo Nogueira
3 de abril: "A historia medieval galega nos libros de texto de ensino secundario", José Manuel Barbosa
17 de abril: "A guerra transnacionalizada a mediados do século XIV", Francisco Rodríguez
24 de abril: "Os Castro e outras familias da nobreza galega en Portugal", Luís Duarte
8 de maio: "Fernán Pérez de Andrade, a nobreza trastamarista en Galiza", Xosé Francisco Correa
15 de maio: "Información sobre Pardo de Cela", Carlos Breixo

Se estiverdes por Lugo, por Santiago ou por Ferrol neses días, xa sabedes!

Always look on the bright side of life...

;-)

A primeira medida do PP

O PP quere ensaiar en Galiza un proceso de desmantelamento da cooficialidade dunha lingua, que xa tentaron en maior ou menor grao anteriormente en Nafarroa e nas Balears, mais onde finalmente tiveron que recuar. De nós, da nosa capacidade de mobilización, dependerá que tamén en Galiza poidamos detelos. Se non nos activamos e volvemos pensar, como moitas e moitos ao comezo da campaña electoral, que todo está feito, mal andaremos.

Achégovos o comunicado de imprensa que enviamos hoxe desde A Mesa, organización na cal facedes hoxe máis falta que nunca:

A Mesa anuncia “un traballo incansábel” para que o PP non desmantele “a protección xurídica do galego”

A asociación proporalle diálogo ao novo Goberno e reclamaralle que non tome “medidas unilaterais que poidan crear unha fractura social”

A Mesa pídelle ao PP que deixe de mentir sobre a situación do galego no ensino, “pois gañar as eleccións non fai que as mentiras se convertan en verdade”

Santiago de Compostela, 3 de marzo de 2009.- A Mesa pola Normalización Lingüística, tras o anuncio do PP de que a súa primeira medida será derrogar unilateralmente o decreto que estabelece un mínimo do 50% do ensino en lingua galega, anuncia que “traballará incansabelmente para que o PP non desmantele a protección xurídica do galego”, que a xuízo da maior asociacion cultural de Galiza “suporía un retroceso na calidade do ensino e tería gravísimas consecuencias para a convivencia e para o futuro do idioma propio do país”.

A Mesa advirte ao PP de que “tomar medidas contra o galego suporía crear unha fractura social” e reclámalle “que non ceda á tentación das imposicións unilaterais”, senón que adopte “unha postura construtiva coa lingua e cultura do país, con diálogo coa comunidade educativa e coas outras forzas políticas, que representan a metade do electorado”. Esta organización solicitará entrevistas cos novos responsábeis gobernamentais unha vez que tomen posesión para lle achegar directamente as súas propostas e visións.

Por outra banda, A Mesa pídelle a este partido político que “deixe de mentir”, pois “gañar as eleccións non fai que a demagoxia e as falsidades se convertan en verdades”. A maior asociación cultural de Galiza lembra que “no ensino o que hai é unha lexislación negociada no ano 2007 punto por punto co PP, idéntica á que o PP aprobou noutras comunidades autónomas como as Balears e baseada nun consenso parlamentar en Galiza do ano 2004 no cal tamén entrou o PP”. “Galiza, coas propostas do PP, podería ser a única comunidade do Estado con lingua propia que non gozase de ningún tipo de protección no sistema educativo”, observan.

A Mesa lembra que o actual decreto foi respaldado tamén polos sindicatos que representan ao 90% do profesorado, todas as organizacións estudantís actuantes en Galiza, a confederación dos 125 centros católicos de Galiza e a federación pública de asociacións de nais e pais.

Os ataques e as defensas

Unha amiga pásame unha fotomontaxe que colleu do web de Galicia Bilingüe na que me colocan disque nas filas dos servizos de desemprego (de Madrid?!). Por se non me recoñecedes, son o de verde.

Xa sei que non é novidade, porque nesa páxina xa fixeron un día unha colaxe na que me puñan como un presidiario e outra na que me casaban co que vai ser o novo presidente da Xunta, Alberto Núñez Feijó, disque porque este usa moito o galego. A listaxe de insultos que me teñen pasado deste web é longa, entre os cales sobrancean os homófobos, en plan que "perdo aceite". Alá eles con ese lamentábel odio que os retrata.

Se pensan que os compañeiros e compañeiras da Mesa, eu entre elas e eles, imos deixar de dar a batalla, van bos. Sabemos ben que todos os adiantos para o noso idioma foron gañados a pulso e estamos afeitos pola historia aos terreos adversos e á intemperie. Mobilizarémonos en defensa da nosa lingua máis que nunca. Temos moito por dicir e moito por facer!

Unha segunda rápida avaliación

A próxima segunda feira virá o reconto do voto emigrante, a respecto do cal publiquei o meu artigo desta semana que, como indico nos primeiros parágrafos e ben se nota, escribín antes da xornada electoral. Non se prevé que modifique a asignación de escanos.

Antes de sumar o voto CERA, a confrontación de resultados amosa un PP que practicamente o que fixo foi resistir, xa que apenas ascendeu en número de sufraxios absolutos (756.000 en 2005, 759.000 en 2009), mais que se beneficiou da significativa caída en apoio do PSOE (de 555 a 482 mil) e do BNG (de 311 a 267 mil) que, até onde vexo, se produciu especialmente nas cidades e nas dúas provincias máis poboadas. Dado que a participación aumentou, é de supor que por aí se poidan contabilizar sobre todo os votos para forzas antes inexistentes como UPyD (o seu fortísimo apoio mediático permítelle colleitar 23.000, aínda que menos do 1,5% da torta electoral, a metade da miúda porcentaxe coa que conseguiu deputado en Araba), TEGA (18.000) ou Os Verdes (5.000). Dentro da cola da táboa, nin a FPG nin NÓS-UP recollen voto descontento, xa que tamén reducen un pouco o seu número de apoios; EU si avanza uns 3.000, chegando case aos 16.000, mais sitúase como a sexta forza política de Galiza.

Para o PSOE galego e, de forma máis especial para o BNG, comeza unha travesía do deserto. O meu desexo é que se faga construtivamente, pois non é momento para cainismos nin xogos do todo ou nada. Cómpre, como dicía Marx nunha das súas célebres citas, que non tiremos o neno xunto coa auga suxa da bañeira.

Hai resortes institucionais (Deputacións da Coruña e Lugo, gobernos das cidades e principais vilas; se nos apuramos, goberno en minoría do PSOE no Estado) e tamén estruturas populares para continuar a resistir e que non lles sexa tan fácil o laminamento das conquistas que xa prometeron que levarán a cabo. Tamén se poden conseguir adiantos, claro que si, mais para iso cómpre que saibamos asumir a derrota, corrixir os erros e, a partir de aí, sumar máis pobo. Sen desfalecer, sen darllo feito. Este é un paso atrás importante, mais debe selo para tomarmos impulso, como di o acertado tópico.

Non podo esquecer agora tampouco os resultados en Euskadi, co seu sabor agridoce, pois a pesar do avance en escanos do nacionalismo, hai a posibilidade de que se produza un goberno que homoxeneice máis o panorama estatal como bipartito PSOE/PP.