Que ningún batvilán o impida!

A dobraxe ao galego do mítico Batman dos 60 está feita: repousa no arquivo da TVG. Tras a nova de que a serie vai saír en DVD en 2014, o mellor sería que se lle der unha nova vida á tal dobraxe colocándoa como unha opción do seu menú.

Para que iso for posíbel e que a ninguén lle esqueza, desde A Mesa puxémonos en contacto tanto coa distribuidora, a Warner, como coa propia TVG.


Queremos que o DVD de Batman tamén teña a pista de audio en galego!

Batman, Robin, Batgirl, o Pingüín... tamén saben falar en galego!

Que ningún batvilán o impida! ;)

Prontuario de dereitos lingüísticos

Armando Requeixo publica na súa páxina, Criticalia, unha reseña de Como defenderes os teus dereitos lingüísticos. Moi obrigado pola atención!

Outra boa noticia para a divulgación deste volume deuma onte Marcus no seu twitter: que este libro está dispoñíbel tamén en Amazon.es. De calquera xeito, non esquezades que as librarías de toda a vida continúan a existir (a maioría, con dificultades) e son o sustento fundamental da distribución da nosa literatura e, con ela, do que se chama a bibliodiversidade.

Entre as 100 páxinas galegas máis populares, segundo Alexa e Código Cero

Segundo o ránking de Alexa e o portal Código Cero, este blog está entre as cen páxinas galegas máis populares, mesmo por diante dalgúns medios de comunicación e dos webs dalgunhas institucións relevantes.

O encargado de elaborar esta listaxe en Código Cero, Marcus Fernández, matizou nunha entrada do seu blog hai un par de anos as dimensións e relevo da mesma. Aínda que Alexa é un medidor que se toma decote como referencia, ten limitacións moi importantes, que reducen a súa fiabilidade e o colocan máis ben como un indicador interesante para observar algunhas tendencias, mais para nada en termos absolutos.

En calquera caso, transmítovos o meu agradecemento polas visitas, os comentarios e as ligazóns que fan que esta páxina apareza aí. Baixe ou suba nesa escada, a miña intención é seguir fiel a estas citas co blog, ilo mellorando paulatinamente e mantelo como unha bitácula persoal na que aparezan temas diversos.