O 14 de febreiro, recital en Santiago d@s "Nov@s" da Biblioteca Virtual Galega

Pasaron trece anos e moitas, moitas cousas desde os inicios da Biblioteca Virtual Galega (BVG). Por iso cando Ramiro Vidal Alvarinho me convidou a participar neste recital a miña pregunta foi se non se estaría a equivocar. Eu estivera axudando aos inicios da BVG, so as ordes de Laura Tato, porén non me incluía alí como autor. Mais non, non era iso.

Tratábase de organizar un recital con xente que escribira daquela na sección de poetas "Nov@s". E, si, alí estaba eu, efectivamente, co moi débil pseudónimo de "Carlos Manuel Calhom" xD

Hai trece anos publicara nesa sección dous poemas, os cales viron a luz en libro hai moi poucas semanas -e con poucas mudanzas- no conxuntiño que é Atravesar o fantasma.

En fin, casualidades da vida. Se estiverdes por Compostela o 14 de febreiro, alí nos veremos!

Moitas grazas polo Premio de Poesía do Concello de Ames!

 

Onte pola tarde fixéronse entrega dos galardóns de creación literaria do Concello de Ames. Nos comezos da semana anunciáronme que gañara o primeiro premio de poesía e prevía asistir ao acto de entrega. Porén,  despois de toda a intensidade da organización e desenvolvemento da manifestación xa non dei feito.

En calquera caso, quero expresar o meu agradecemento pola distinción e, de paso, o meu pleno apoio a todos os servizos públicos municipais existentes en Ames que agora mesmo están en risco coa escusa da austeridade, tan selectiva.

Para min é un orgullo estar na nómina dun premio que xa gañaron en anteriores edicións escritores como Alberte Momán, Gonzalo Hermo ou Cruz Martínez.

Ademais, sérveme de estímulo para ir sacando da gabeta algúns textiños literarios que fun compondo ao longo deste anos. Será pouquiño a pouco.

Viva a nosa cultura viva!